مش عارفة اذا كان قرار صح وللا غلط، مش عارفة اذا كان جه متأخر وللا مكنش لازم ييجي اصلا. مش عارفة اذا كانت خطوة مفيدة ليا وللي بيحب يقرالي وللا لأ
بس يعني انا عندي مبرراتي اني انقل لمساحة خاصة ودومين خاص وكده
اولا: بقالي فترة عايزة اكتب شرح لحاجات انا بعرف اعملها، من باب تبادل الخبرات ومن باب ان الواحد واجب عليه يعلم العلم اللى تعلمه.
ثانيا: لما انقل حياة مدونتي الى نظام ادارة محتوى زي دروبال دا هيديني امكانيات اعلى بكتير - محتاجاها طبعا -
ثالثا: ولا بعدين، يارب بس يعجبكم الجو.. ما هو لو.. بيخلي الضو.. يسير الجو بيعجبني :)

عيد سعيد.. يارب يكون عيد سعيد، وتكون كل أعيادنا سعيدة، تكون كسوة للمسكين، ولقمة للفقير، وحق مردود للمظلوم.

موضوع ان واحد يتجوز على مراته ده، موضوع مزعج جدا بالنسبة لي. ويمكن دا اللي خلاني اتابع "سلطان الغرام" في رمضان، احاول ادي لنفسي فرصة تخليني افهم نفسية البني ادم اللي بيتجوز تاني على مراته "فراغة عين" بدون سبب حقيقي او داع زي الاسباب اللي "حددها" الدين

يعني مثلا لما ابتدا سلطان يبص لواحدة تانية غير مراته، بص عليها بعين والعين التانية ابتدا يفرز بيها عيوب مراته.. وبقى السيناريو شبه متواطىء معاه في انه يوجد له سبب درامي ، او يوجد لنا احنا سبب يخلينا نتعاطف معاه. فيسهب لنا في مشاهد توصف لنا زوجه مهملة في نفسها وجوزها ييجي من البيت يلاقيها بتمسح .. بقية التدوينة

انتو يا عالم يا اللي فوق، ياللى قاعدين على سحابة سودا وتخينة ومدلدلين رجليكوا وبتاكلوا في اته محلولة، يا اللي بتقولوا ان "الناس ايام الملك فاروق كانت بتئن من العبودية والا مكنتش الناس التفت نحو الثورة" *

بعيدا عن ايام الملك فاروق والملك عبد ربه، وبعيدا عن ثورة 23 يوليو والكلام ده.. عمرك شفتنا عملنا ثورة عشان مصطلحات زي "الحرية" "الديمقراطية" "التعددية".. هل عمرنا عملنا ثورة ضد مصطلحات زي "العبودية" "الظلم" "الفساد" ؟؟؟

يا فندم، الشعب لو عمل ثورة هيعملها عشان لقمة العيش.. واللي تقضي.. اللقمة الي تسد جوعة يعني

ودي مشكلتكم اللي بتورثوها لبعض جيل ورا جيل، وفي الاخر تقولوا هو الشعب مش فاهمنا ليه، هو الشعب مش بيعمل ثورة ليه

ليه الشعب ما بيعملش ثورة عشان الديمقراطية ولمنع التزوير في الانتخابات ؟ .. بقية التدوينة

- تعليقا على أكثر من خبر في الآونة الأخيرة يتحدث عن حوار الأديان ، وتحديدا حوار الفاتيكان مع علماء المسلمين-

عندما يقرر "س" المسيحي و "ص" المسلم الجلوس على مائدة خشبية مستديرة متوسطة الطول ذات مفرش أبيض ينتصفها مزهرية -الله يمسكي بالخير يا فيروز- بها باقة من الورد الملون، وعندما يفتحان ملفاً برتقالي اللون مكتوب على طرفه بشىء من الميل "حوار الأديان"... ماذا يعنيان تحديدا بمصطلح "حوار الأديان" اذا سلمنا أننا جميعا نفهم معنى كلمتي "حوار " و "أديان"؟

- مع العلم بأن حديثي لن يخرج عن الفكرة السطحية الخاصة بحط النقط ع الحروف- اي تحديد المصطلحات الخاصة بالموضوعات وليس أعمق من ذلك- .. بقية التدوينة

لأ بجد بقت حاجة تزهق

بقى لها كام سنة حاجة محرجة، لكنها دلوقتي بقت حاجة تزهق، وحاجة تقرف.. وحاجة تحرض على نتائج عكسية

اصل انا اكتر مشوار بكرهه في حياتي يوم ما اروح اشتري هدوم جديدة

افففف.. بيبقى يوم الشقاء والعذاب والدوخة واللف والدوران والطلوع والنزول والمشي والسلالم والبروفات والشماعات والألوان والتفصيلات وكمان الترتر.. وما لايقل عن تلاتين محل تقريبا عشان بلوزة يتيمة على جيبة يتيمه بردو وعليهم حتة ايشارب ايتم من الاتنين

ليه يوم متعب كده؟ لأني مش بلاقي اللي انا عايزاه

وليه مش بلاقي اللي انا عايزاه؟؟

اه هو هو دا السؤال!!

والله انا مواصفات لبسي مش معضلة، ومش ازمة..بس هما اللي بيخلقوا ازمة .. بقية التدوينة

الجرايد بتقول ان عم المفتي قال عن غرقى ايطاليا " دول مش شهدا.. دول طماعين"

----

واحد
هو لما علي جمعة يقول ان غرقى ايطاليا "مش شهدا" هل دا معناه:
- انهم كَفرا؟
- انهم هيروحوا النار؟
- انهم وحشين وشريريين؟؟

ما هو مش كل من مات يبقى اجباري يكون شهيد.. ومش كل من هو مش شهيد انه مش حلو وطيب وكويس وهيدخل النار يعني.. واحنا عارفين كده كويس

- السعي على الرزق مطلوب
- وربنا بيحثنا نسعى في الأرض.. ونرحل من الارض اللي مافيهاش رزق، عشان نلاقي رزق في مكان تاني
- والدولة بتاعتنا بنت كذا في كذا، وهي السبب في البطالة والفقر والبهدلة اللي الشباب وغير الشباب شايفها،
- كل دا كلام حلو.. وكلام جميل.. "ولا غبار عليه" .. بقية التدوينة

مع ازدياد هذه الدرجة من وضوح الرؤية تجيء قناعتك في صورة واحدة تتلخص فى أن " الحب هو الخبرة التي نولد بها فنحن لا نحتاج لممارستها أولا كي نكتسب معرفةً بها"

هى بلا شك، محاولة استدعاء صورة تشكلينها بنفسك.

على أن الاستقرار الذي يشملك فى هذا الادعاء يجعلك أكثر مثابرة على المضي فى متابعة هذه الخبرة، وعلى خلق الحالة التي ترغبين فيها ، متحدية هواجسك الداخلية بأن ما تحلمين به أبداً لا يتحقق. هكذا تكونت لديك صورة مشعة عن ذاتك، ترفض التدخل القصري لأحلام اليقظة فى الأمور المصيرية لأنها تفسد عليك التحقيق.

والآن أنتى تقفين على عتبات الكتابة.. متحفزة ضد كل الحكايات التقليدية، متحولة بذلك عن الشغف بكل ما سطر عن الأحداث الأسطورية التي تغلف البدايات ، وعن امكانية حدوث ذلك لكل البشر، وجميع الناس.

هو إذن ليس تحفزا ضد البدايات التقليدية انما هو ضجراً من الانتظار .

صديقتي، وما القدرة على الانتظار إلا الخبرة الأخرى التي فقدناها عندما جئنا للحياة

فلتكن الكتابة إذن هي الخبرة التي نكتسبها بمجرد الرغبة في ذلك :)

افرغ محتويات الكيس
حتى لا يتبقى شيئا فيه من ذلك المسحوق الأبيض.. الناعم شديد الدقة مثل محاولاتك لرصد كل عيوب الذاكرة.
تأكد جيداً، أن كل المقدار قد أفرغ في فنجان زجاجي.. شفاف لا تشوبه أية زخارف.. واضح بقدر ما يبديه قلبك، أملس بما يشبه نياتك المسبقة.
احضر مقدار مواز من الماء المغلي، وصب نصفه في الفنجان.. ربما تحتاج لقليل من الماء المتبقى، فلا تتخلص منه. فقط نحه جانباً الآن.
عندما تمسك بالملعقة الخشبية لتقلب المحتوى، فليكن الاتجاه واحد، وليكن أداءك هادئا متشبها بالحركة البطيئة للعجائز وما تصحبه من حكمة المرور على وجه الزمن.
من الضروري أثناء تلك العملية التي لا يجب أن تتوقف لمدة عشر دقائق، أن تحافظ على التنفس المنتظم والعميق والبطيء.
استمتع بما يتصاعد من رائحة الليمون الاصطناعية. هي منعشة.

لن تخسر بالمرة إذا تخلصت من هذا المزيج بعد انقضاء العشر دقائق، فلا ذاكرتك ستنشط إذا احتسيته، ولن تكتسب حكمة العجائز بين ليلة وضحاها. لكنه تمرين جيد لمعصم اليد اذا حافظت على تكراره يومياً.

القضاء المصري يرفض الدعوة القضائية التي رفعها المستشار عبد الفتاح مراد لحجب واحد وخمسين مدونة وموقع، وكان منهم مدونتي -بنت مصرية- وكانت القضية محاولة من سيادة المستشار للشوشرة على كشف المستور الذي قام به عمرو غربية في احدى تدويناته واكتشافه سرقة محتوى كتاب صدر عن الشبكة العربية لمعلومات حقوق الانسان وأيضا من محتوى مدونتي التي شرحت فيها "كيف تنشىء مدونة" على بلوجر. القصة كاملة والتفاصيل هتلاقيها هنا.

هي ام كلثوم في المناسبات دي كانت بتقول ايه؟ :))