قريت موضوع بيتكلم عن التدوين اليومي كنوع من العلاج النفسي او حاجة ز ي كده، بيتكلم ان الواحد يدي لنفسه 15 دقيقة في اليوم يكتب فيهم عن اي حاجة وينشرها.
فراغ مش كده؟
الغريبة ان الفكرة "وجدت صدى ليها جوايا" او بمعنى تاني اغرتني اني ألعبها، يقولوا علاج وللا مش علاج، عموما الواحد شايف نفسه دايما اعقل من ناس كتير يعرفهم :) بس مش عارفة ايه اللي انا محتاجة من الفكرة دي عشان تستفزني اوي كده واقرر اخوضها، معرفش ايه اللي ممكن اكتب فيه اصلا، طبعا انا عندي كلام كتير اقوله للعالم D: لكن محتاج بس تحفيز كفاية ويمكن فكرة التدوين اليومي تكون عامل كافي ، يعني على اسوأ الظروف هكتب عن حاجة شفتها او حصلت لي، هفتن على الناس اللي حواليا، وههددهم اني ادون عن اي حاجة يعملوها تضايقني او ماتضاقنيش، ما انا لازم اكتب حاجة، او هتكلم عن احلامي اللي راحت وااللي لسه جوايا، او هفتي في مشكلة العيش او سراندوا او كليبات التعذيب، او يمكن اتكلم في الكورة اللي مش بفهم فيها، او حتى اعلق على كتاب اورواية عجبتني او ماعجبتنيش او رواية منحوسة كل ما اجي اقراها حاجة تخليني ماقراهاش..او اشتم؟ - لا ما عتقدش- او مشاريعي الخفية اللي محدش يعرفها غيري، او معلومة جديدة اتعلمتها في مجال شغلي، او الفرنساوي اللي بتعلمه، او احكي عن "مو" - مين "مو"؟ - او الفراغ اللي عايشاه ومش عايشاه، او الامراض النفسية اللي بعتقد اني مصابة بيها، او عقدة حياتي اللي اكتشفتها اخيرا، او اكتب عن فلسفتي في الحياة - "ما انا عندي فلسفة خاصة بيا"-
يعني، غالبا.. احتمال..
متوقعة ان تدور اغلب مواضيع التدوينات اليومية عن الحاجات دي.. "امال هتكون عن ايه تاني غير كده"
الاكيد كمان انها مش هتكون مواضيع مكتملة النمو، يعني مش متوقعة مني ان اكتب عن فكرة بشكل كامل، يادوبك ربع ساعة لن تسع اكتر من سرد بدون تدوير وتقييف وتلطيف ومعالجة وكده..
وممكن طبعا ماكتبش حاجة اصلا.. هعرف بكرة
هي حاجة حلوة
هي حاجة حلوة جدا أن الواحد يكتب بشكل يومي أو شبه يومي .. بالذات في مدونتك انتِ ؛ لأن متعة اني اقرأ تدوينات جديدة عندك كل يوم ...... بس دي فكرة خطر :D
لأنه غصبن عن المدون بئره التدويني هيجف أو هيتسد مع مرور الوقت مهما كان عميق ومش هيلاقي حاجة يكتبها .. هيجف نتيجة ضغوط الحياة أو الملل أو بسبب تعليقات رخمة أو حتي بسبب ضغط قُراءه اللي بيحبوه عليه انه يكتب جديد ؛ لانهم اتعودوا منه كل يوم جديد .. ويوم ما هيوصل للمرحلة دي مش هيلاقي إلا مدونته ويعاقبها .. يا يلغيها أو يبطل تدوين أو يقتلها ببطئ بأنه يدون كل 3 أو 4 شهور ....
رأيي الشخصي استغلي الطاقة الجديدة دي فى تنظيم عدد التدوينات شهريا .. يمكن تبان فكرة سخيفة شوية أن الواحد يكتب عدد تدوينات محدد فى الشهر بس دة أفضل من لو تعب نتيجة الكتابة بشكل يومي .
ميرسي يا أحمد ع
ميرسي يا أحمد ع التعليق :)
بس خلينا نتكلم بعيدا عن فكرة "البئر التدويني" ، مش عارفة يعني لو جيبا اعتبرنا ان التدوينات عبارة عن مكمية معينة ، قول عشرة كيلو.. فانت بتفضل انهم يتعرضوا خلال خمس سني مثلا، وانا بفضل انهم يتعرضوا خلال شهرين تلاتة.. فتفضل ايه؟ طالما هي كده كده كمية م، اعتقد ان الافضل ان المدة تكون اقل D:
ولو اعتبرنا فعلا ان الانسان في اي نوع كتابة بتيجي له فترة مش بيلاقي حاجة يكتبها، فطبيعي انه يتوقف للشحن :) ، وعلى اعتبار ان دا امر طبيعي.. زى ما انا شايفة بصراحة، يبقى ليه لأ، اكتب واكتب لحد ما ملاقيش حاجة اكتبها.. الفكرة مش مرفوضة عندي
كنت لسه بفكر في
كنت لسه بفكر في حاجة قريبة، من غير ما اقرا عنها. عاوز اعمل تجربة كاني كاتب عمود صحفي يومي، يبقى لازم اكتب كل يوم. لان النبش في الذاكرة والعقل ممكن يطلع حاجات هتفضل مدفونة. وانا شايف ان الكتابة نوع من العلاج برضه. بس انا شايف انها برضه تكون كتابة بتركيز شوية عشان تجيب فايدة. يعني تبقي كأنها جلسة تأمل من الانسان لنفسه ومحاولة يومية لفهم النفس بشكل افضل. لكن لو مجرد كتابة سريعة "من برا"، يعني من سطح الوعي، فمش هتجيب النتيجة العلاجية المطلوبة. المطلوب انها تكون كتابة من تحت سطح شوية. ودي عاوزة شوية هدوء وتأمل بدون عجلة. ممكن بقى الواحد يلاقي وقت كل يوم لهذا الهدوء؟ ما اعرفش، بس التجربة هي الحكم!
ياريت نبتدي
ياريت نبتدي فعلا.. ننفذ الفكرة يا محمد.. عموما انا حابة اني اخلي الموضع على سجيته جدا.. مكنش متعمدة اني اضيف بعد او قيمة ما للكلام اللي هيجي في بالي اقوله، عشان كده قلت احتمال تكون الحاجات مش مكتملة النمو، لكن اكيد حتى المش مكتمل النمو ده هيكون بيعني شيء او بيمثل لي شيء لي انا على الاقل..
ما عنديش مانع
ما عنديش مانع نبتدي مع بعض واي حد كمان عاوز يخوض التجربة معانا. ممكن نحدد تاريخ معين، شهر يبدأ في يوم معين وينتهي في يوم معين، لان طبعا صعب ان الواحد يعمل كده على طول، بس نخوض التجربة عشان انا مؤمن ان الافكار التي لا تنفذ بتفضل موجودة في وعي الانسان وتقلقه، يعني ما نخليش في نفسنا حاجة!
كلام جميل احب
كلام جميل
احب اشاركك نفس الفكرة، فكرت في كده، خصوصا انه نشر الموضوع مش بياخد وقت
في الغالب
يمكن المشكلة انه الموضوع ممكن يبقى عبء على الواحد، لما يحس في وقت انه وراه التزام، او واجب يومي او شبه يومي
مش عارف..!!؟
انا غالبا هرجع اعلق تاني
:)
دا اللي انا
دا اللي انا خايفة منه، بس عايزة اجرب، ومش هندم لو توقفت بعد اليوم التالت :)
ياللا نجرب سوا
نفسى أعمل كدة
نفسى أعمل كدة يا زينب
بس المشكلة مشكلتين
1. مفيش وقت.. يادوبك الواحد بيروح البيت.. ح يفضى يكتب ولا يمارس مهام حياته الطبيعية
2. الخوف من الكتابة عمال على بطال تفقد قيمتها بالنسبة للإنسان، أو الإنسان اللى يفقدها قيمتها
فهمانى بقول ايه؟
يعنى الكلام الكتير تأثيره مضر زى الكلام القليل
لكن ع الأقل لما الواحد يقول كلمة قليلة وتتسمع.. أحسن من كلام كتير ومحدش ياخد باله منه
:)
لكن عموما.. ومراعاة للجيرة والعشرة.. قررت اشاركك المشوار
أخدنا إيه من السكوت لما نعترض ع الكلام
كله مش فارق
:D
الى اللقاء عزيزتى.. مع أمنياتى بدوام الكلام والتدوينات
انا كمان عندي
انا كمان عندي فلسفه خاصه جدا بيا :)
بس ايه عقده حياتك الي اكتشفتيها دي :D
معنديش اي خبر
انا كمان بعمل كده من فتره بس مش بكتب في البلوج انا بكتب في كشكولي السري
:)))
تعلـيق