الباشا نائب الشعب

الدولة اللي يحكمها عسكر.. بتخرب
والدولة اللي يحكمها تجار.. بتخرب
ما بال دولة بيحكمها عسكر وتجار مع بعض؟

عمرو أديب بيقولك انهم في مجلس الشعب، كانوا بيناقشوا قانون مكافحة الاحتكار،

قام عم الحج أحمد عز، رفض ان المحتكر يدفع 15% من ضمن العقوبة يعني، والأغلبية كانت معاه

ثم قام أحمد عز برفض فكرة "الشاهد الملك" يعني لو جه واحد بلغ عن جريمة احتكار كان مشترك فيها لا يعاقب، وبردو الأغلبية كانت معاه

الكلام ده كان من يومين

القانون اتظبط على كده ، والفضيحة انسكت عنها.. ومحدش جاب سيرتها ولا كتب

النهاردة كان اخر يوم في المجلس، جه الاستاذ احمد عز النهاردة وقدم اقتراح النهاردة، ان الشاهد اللي يبلغ عن جريمة احتكار ياخد نص المدة اللي المفروض كان يعاقب بيها..

والاغلبية كانت معاه

يعني بالفم المليان.. اذا كان ضميرك وجعك وعايز تعترف بكل حاجة.. هتتعاقب بنص المدة.. ابقى قول بأه

متصورين!!

انا بأه مش متصورة، ايه النفوذ ده، وايه الفساد ده، وايه السيطرة دي..

في مهزلة اكتر من كده؟ اكبر مجرم في البلد، اكبر محتكر في البلد، يقف بكل جبروته وبكل ما أوتي من قوة -مال ومنصب وسلطان- ضد قانون منع الاحتكار، فيهلهلة ويخرمه ويمسح بيه أرضية مجلس الشعب، والأغلبية معاه

بتاع ايه يكون برلمان كامل فاسد -إلا من رحم ربي- ؟
بتاع ايه الشعب الغلبان ده يتحكم فيه كام واحد.. اسمهم "اغلبية".. على راسهم واحد اسمه "عز"