بالأجر.. بالعقد.. مش بالتعيين

قال وانا اللي كنت مفكرة إني مش هلاقي حاجة اكتبها، خد عندك دي

لما دخلنا كلية تربية -الكلام ده من عشر سنين - كانت الكلية محسودة لأن الطلبة بيتخرجوا يشتغلوا على طول، الحقيقة في نفس سنة إلتحاقنا بالكلية اتلغى التكليف.. يعني زينا زي بقية الكليات هنتركن ع الرف لحد ما الحكومة تعطف علينا وتنظر لنا بعين الرحمة وتعيننا

شفت بعنيا الدفعات اللي سبقتني وقعدت في البيت، او اشتغلت بنظام مفتكس اسمه "بالأجر"، ودي طريقة اخترعها جهابزة وزارة التربية والتعليم، لأن مجال زي التدريس محتاج دايما مدرسين، ولأن مفيش في خزنة الدولة اللي يكفي مرتبات مدرسين جداد، فبقي الموضوع ان مدرس يستلم شغله في المدرسة، لسنة واحدة ويتحاسب بالحصة، احيانا الحصة تقف عليه بعد خصم الضرايب والحاجات التانية، على اربعة جنية، او ستة جنية معتقدش انها اتنطتت في يوم من الايام لاكتر من كده.. كمان مش مسموح ان المدرس الواحد ياخد اكتر من اتناشر حصة، وحاليا بقوا ستة حصص - في الاسبوع يعني- حاول تحسب بأه بياخدوا كام في الشهر

طبعا، في الحالة دي، هما مش بيبصوا للفلوس قد ما بيبصوا انها فرصة كخبرة ممكن تسفرهم بره او تديهم أولولية لما ييجي التعيين ولأن الكل بيتخيل انه مفيش في ايده حيلة غير المرمغة في تراب الحكومة - حتى لو بالأجر - ظهرت الواسطة..

كنت أنا خلصت الكلية، ومكنش عندي استعداد إني ابتدي حياتي بخطيئة من نوع اجيب واسطة اشتغل في مدرسة.. وفضلت سنتين على كده.. لحد ما جت فرصة من غير واسطة.. اشتغلت يومين وبعدين اكتشفت إني مبحبش التدريس.. ومكنش سهل طبعا إني اغير مسار حياتي.. وحصل واتغير الحمد لله بس دا موضوع تاني

المهم يعني، انا دلوقتي بعدت عن المجال ده نهائيا.. بس اصحابي دخلوا الطاحونة دي.. اللي بقالها مدرسة بالأجر خمس سنين، واللي بقالها تلاتة..

وامبارح عرفت من واحدة منهم، ان المديرية عندنا هتعمل عقود.. وعقود يعني يتعاقدوا مع المدرس لمدة سنتين، بجدول كامل واجازات كاملة ومرتب كامل ومكافاءات كاملة.. بس لمدة سنتين بس.. قابلة للتجديد، يعني م الاخر هيبقى تحت رحمة الناظر والمدرس الأول والموجه وكل عفاريت العلبة اللي اكبر منه

دلوقتي بأه، مدرسين الانجليزي اللي بالأجر عندنا 400 واحد، والعقود المطروحة للقسم ده 80 عقد بس.. ومين البطل هنا؟؟؟؟

متوقع هه؟

الواسطة..

صح

بس كمان الموضوع بأه معقد شوية.. تقريبا كل اللي اشتغلوا اصلا بالأجر جايبين وسايط، وهي نفس الوسايط اللي هيستخدموها في الحصول على العقود.. وبالتالي الصراع بقى فاقع جدا... من نوع صاحب الواسطة الأكبر والأهم له العقد، ولا عزاء "لتكافؤ الفرص"