احب اقول ان "الثورة" فكرة "الثورة" يعني.. مجرد الفكرة.. مستفزة جدا جدا بالنسبة لي دلوقتي، سواء كانت ثورة شعب، او ثورة جيش -ماشيها ثورة- او ثورة قلة منحرفة، او قلة ذات توجه فكري ما، او اي حاجة في اي حاجة.. فكرة القيام بحركة مفاجأة لقلب الترابيزة فاللي فوق يبقى تحت واللي تحت يبقى فوق هي كارثة اكتر منها حل.. الحقيقة كمان، انها بتكون مجرد "نتيجة تدهور اوضاع".. و"نتائج" تدهور الاوضاع عمرها ما تكون "حل للأوضاع دي"
اوضح اكتر..
ظروف زي اللي احنا فيها دي، تدهور مستمر ومتصاعد على جميع المستويات ممكن جدا ينذر بكارثة من نوع ثورة، الناس تزهق، تطق، تطلع من هدومها.. وييجوا قلة "ما" ذات توجه فكري "أيا كان" يركبوا الموجة ويقولوا "احنا الحل"،
والناس من باب اليأس هتقولك تجرب..
ولأننا عارفين مسبقا ان نفس الناس اللي قلبت الترابيزة ، عندهم امراض اجتماعية بالهبل، ومشاكل تتلخص في " سوء التربية" و فقدان كثير من قيم ومبادىء الإنسان/المواطن "الصالح" .. فالنتيجة المنطقية لثورة زي كده هي "الفشل"
ينطبق الكلام ده بحذافيره، على ثورة زي ثورة 23 يوليو.. صحي الشعب في يوم وفتح الراديو لقى السادات بيقولك حاصروا قصر عابدين... مفيش كام ساعة وكان الشعب اندمج في الموجة ودخل البحر بكل قوته.. ضجرا من النظام الفاسد السابق، واملا في الكلام اللي بينقط شهد وسكر من بق الأخوة الضباط الأحرار..
وحالنا بعد خمسة وخمسين سنة.. صفر/صفر.. لا أمة اتبنت من جديد، ولا روح انسان اتولدت من جديد.. بل أكاد اجزم ان امراضنا الاجتماعية والاخلاقية ازدادت تنوعا وشراسة.
كمان الثورة كفكرة مجردة معقداني ليه؟ لأن الثورات عادة بتبتدي بكلام حلو، وبعدين بتقلب قلة أدب.. سجون، معتقلات، تعذيب، حاجة من باب "حماية الثورة المقدسة ومبادئها من الاشرار ذوي الأنياب المفترسة"
عندك مثلا الثورة الفرنسية.. ودي اشهر من نار على علم.. وكل من يقول يا تاريخ، يقولك ع الثورة الفرنسية ثورة.. واللي غيرت تاريخ فرنسا وأوروبا والغرب كله.. الحقيقة والعالم كله.
في مرحلة دموية من مراحل الثورة الفرنسية كان عندهم حاجة اسمها "قانون المشبوهين" وكان بيسمح لسلطة الثورة انها تقبض على الناس بالشبهة، مجرد ما تشتبه في انسان يقدم للمحاكمة، بيكون الاشتباه ده في "انه مش منتمى لمبادىء الثورة" او "مش منتمي كفاية"، كانوا ممكن يقبضوا على واحد لمجرد ان مواطن تاني قدم فيه بلاغ.. المحكمة بتكون صورية، مابتسمحش للمتهم بالدفاع عن نفسه، ولا بتوكيل محامي.. واحيانا مايكونوش بيتأكدوا من ان المقبوض عليه ده هو فعلا الي اتقدم فيه البلاغ، وممكن كمان لو حد دافع عنه يتاخد معاه للمقصلة... ايوه المقصلة، ما هي دي العقوبة الوحيدة للمشتبهين دول..
آلاف راحوا ضحية للمحاكم الصورية دي، والمقصلة بدت انها الوسيلة الوحيدة لقادة الثورة الفرنسية في الوقت ده للسيطرة على الاوضاع، وتعويض/التغطية على فشلهم في ادارة شئون الدولة، أما المسئول الأول أمام التاريخ عن حوادث عصر الإرهاب دي كان واحد اسمه روبسبير، تخيل هذا الطاغية لما يقول بكل صراحة -وربما عن قناعة داخلية- : "نحن لا نريد الطغيان لذاته.. وإنما نريده دعامة للجمهورية الصالحة"
تقول ايه بأه بعد كده؟؟ شخصية مشوهة.. وعجزت عن ادارة شئون بلدها، فكان الحل قصاده هو الطغيان والظلم. .وتحولت على ايديه مبادىء الثورة الفرنسية من وسيلة لرخاء ورقي الشعب الفرنسي لمعبود ومقدس بيحاول يستخدم كل الوسائل للحافظ عليه.. منتهى التشوه
أنا مابحبش الثورات.. مش هي الحل أبدا، مش هي الحل.
أمتعتينى
أمتعتينى
السلام عليكم
السلام عليكم ورحمة الله وبركاته
تحليل قيم فى أسلوب بسيط وسلس
تقديرى واحترامى
أنا من جيل
أنا من جيل الثورة...بمعني أني الآن في الخمسينات من عمري وأحسب أن لهذه الثورة أيادي بيضاء علينا جميعا.لكني علي كل حال لن أتوقف عند هذه النقطة كثيرالأني قد أكون غير محايد في رأيي.
أما نقطة رفض فكرة الثورة لأنها نوع من قلب الأوضاع الهمجي وفرصة لممارسة الإنتقام المبرمج من الآخرين فأنا معك تماما في هذا ورغم رفضي التام لما يحدث في مصر الآن الا أني لا أتمني أن يحل بثورة لأنها ستكون ثورة جياع ولن يجد هؤلاء الجياع من ينتقموا منهم إلا جياع آخرين! ربما يكونوا أقل منهم جوعا!
وتصوري مثلا قيام هذه الثورة ووصولها إلي مدينتي الصغيرة في الدلتا لن يجد هؤلاء الجياع إلا أنصاف الفقراء أمثالي للإنتقام! ليس معني هذا أن رأيي وليد مخاوف شخصية (وإن كنت لا أنكر وجود هذه المخاوف)لكن الخوف من ذبح الأبرياء في طول البلاد وعرضها فقط لأن الكبار قد استعدوا لهذا اليوم ولن تجدي منهم وقت الإنتقام أحدا!
دعيني الآن أطرح سؤالا...
هل ترك النظام حلا بديلا لتداول سلمي للسلطة؟
الثائر الفرنسي
الثائر الفرنسي روبسبير كان ديتاتورا صاحب فكر.....منتهي التناقض
متفق تماماً..
متفق تماماً..
بقين اخوانجيين
بقين اخوانجيين قوي LOL
ما علينا، طيب السكة منين؟
اذا كانت الأمراض الاجتماعية تمنع نجاح الثورات..
وفي نفس الوقت النظم الموجودة مستفيدة من الأمراض الاجتماعية فبتمنع علاجها..
نطلع من العجلة ازاي؟!
- بقين
- بقين اخوانجيين !! هو انا كلامي هيتصنف دلوقتي يا عم احمد؟ عموما انا والحمد لله لا احسب على الاخوان ولا على غيرهم. وكمان مش الاخوان بس ليهم اراء مضادة للثورات وللا الاخوان سجلوا الرأي ده في الشهر العقاري بإسمهم P:
- مش الامراض الاجتماعية هي اللي بتمنع نجاح الثورات بالشكل المباشر ده.. الثورة نفسها مصدر فشلها، لأنها اصلا مش حل، هي دايما بتيجي كنتيجة.. وماينفعش نقول ان النتائج حلول.. البذرة هي اللي فاسدة اصلا.
نطلع من العجلة ازاي؟.. امتنع عن الاجابة حاليا - أو مؤقتا- D:
أنا معاكى فى
أنا معاكى فى رأيك ده وده اللى بقالى فترة بفكر فيه .., عمر الحل ما كان فى ثورة واكبر دليل على ده اللى احنا فيه حاليا .., مع اختلافى معاكى فى ان ثورة 23 يوليو دى مكانتش ثورة .., دى كانت انقلاب او نقول حركة ظباط والشعب زاط بعد كده على عادة الشعب المصرى فى حب الزيطة
الظباط اللى عملو الثورة كان ولاؤهم لنفسهم اكتر منه لمصر والمصلحة الفردية كانت فوق مصلحة الشعب وبداية من عزل محمد نجيب وتحديد اقامته مرورا بالنكسة وبعدها الوكسة اللى احنا موجودين فيها دلوقتى بيوضح كلامى
وانا بيتهيألى لو قامت ثورة دلوقتى مع انى بين قوسين بشك جدا فى ان ده ممكن يحصل .., فانا شايف ان نتيجتها هتبقى مصيبة سوده لان مفيش حد متفق فى مصر دلوقتى ولا حكومة ولا معارضة ولا اشخاص مستقلين حتى على نظام نمشى عليه .., محدش عنده تصور أو رؤية ممكن نقتنع بيها ونشوف ان هيا الحل فعلا للخيبة اللى احنا فيها
انا مش متشائم بس الوضع اللى احنا محطوطين فيه دلوقتى هو اللى بيقول كده
كمان احنا شعب بيحب الانقياد ورا رموز شايفين انهم عندهم الحل .., هاتيلى حد دلوقتى تقدرى تشاورى عليه وتقولى ده رمز عنده كاريزما تقدر تلم الناس
مظنش هتلاقى
الحل مش عندى ولا عندك
بس الاكيد انه عند ربنا
:)
صورة انقلاب
صورة انقلاب الجيش في السودان وموقف سوار الذهب من تسليمه الدولة لمن اختاره الشعب
وكذلك تجربة موريتانيا(ولد فال)
تعطي أملا لوجود متمردين وثورجية مستنيرين
والحل سيأتي(من غير يأس ولا إحباط)
لو سألنا شعب مصر قبل الثورة بأيام هل يتوقع التغيير؟لقال: لا.
وعلى فكرةوقت الثورة الشعب نفسه هو الذي سيطالب بالانتقام ,بس المهم التنفيذ يكون صح
وطبيعي وجود بعض التجاوزات في البداية
لا أدافع عن ثورة يولية لكنها فذلكة سريعة لطبيعة أي ثورة .
ازيك يا زيزي
ازيك يا زيزي عاملة ايه؟ يا ترى فكراني؟
متابعاكي من ساعة ما عزلتي هنا بس الحقيقة مش بعلق خالص ، انما موضوع الثورة دا مينفعش الواحد ما يعلقش عليه.. بصي.. بغض النظر عن كلامك عن عدم جدوى الثورة دلوقتي وعن الثورة الفرنسية انا هعلق على نقطة ثورة يوليو
انتي بتقولي ان حالنا بعد ثورة يوليو بخمسة وخمسين سنة صفر ، لكن اسمحيلي دا مش ذنب الظباط الاحرار اللي قاموا بالثورة وهما همهم الاصلاح فعلا.. عبد الناصر بدا الاصلاح فعلا ومصر في عهده بدات تبقى دولة ليها وزنها ومكانتها ودورها الحقيقي الفعال ، ودا انعكس كمان على اوضاع المصريين جوة البلد ، وعشان كدة كان لازم امريكا تتامر مع اسرائيل على تنمية عبد الناصر وتوقفها باي شكل ، ودا اللي حصل بنكسة 67 .. صحيح عبد الناصر كان ليه اخطاء ، لكن نابعة عن انه بشر عادي مش رسول ولا ملاك ، ولو اللي بعده حبوا البلد دي نص ما هو حبها مكانش دا بقى حالنا دلوقت ، ومش ذنب الثورة ان اللي بيحكم البلد خاين او عميل او مش فارقة معاه
تحياتي
ازيك يا بوبو..
ازيك يا بوبو.. :)
- عندي وجهة نظر خاصة بالمؤمنين بالتغيير - بأي طريقة كانت- مش بالضرورة انهم يقدروا يكونوا ناجحين في "ادارة شئون البلد" لمجرد انهم نجحوا في تغيير الحاكم، او طبيعة الحكم ...
وبالتالي انا ماقدرش اشكك في نيات الضباط الأحرار او اي مجموعة في اي جزء من العالم امنت بتغيير اوضاعها للافضل ايا كانت الطريقة.
وفي نفس الوقت، دا مايديهمش الصلاحية المطلقة في ادارة البلد، لمجرد انهم هم اللي انهو الملكية، البلد كان فيها احزاب وحياة برلمانية... وحراك سياسي والحقيقة ان كل دا اتقتل مع حكم عبدالناصر -واللي انا كنت لزمن قريب شايفاه اقرب للملايكة اللي غلطاتهم تتعد ع الاصابع- بس دي مش الحقيقة، اللي حصل في العصر ده، سواء كان ناصر السبب او بطانته او حكومته او عصره ككل كان صعب جدا علينا.. في وقتها ولحد دلوقتي....
ايه نوع الاصلاح اللي كان على ايد الثورة؟ قانون الاصلاح الزراعي؟ ونزع الملكيات عن اصحابها لمجرد انها كتيرة.. لو الثورة كانت بتتحرى الحق والعدل، مكنتش انتزعت ملكيات الا بعد التأكد من ان فلان الفلان يملك ما ليس حقه، وما اغتصبه..
ايه نوع الاصلاح كمان؟ التوجة الاشتراكي وتأميم البلد لصالح غول واحد اسمه الحكومة؟ وتحويل الشعب لمجرد مجموعة موظفين بيتمنوا المرمغة في تراب الحكومة والقعاد ع المكاتب.. لحد ماترسخت المفاهيم الطبقية اللي بتفرق بين الفنيين والعمال وبين الموظفين والجامعيين؟؟ وعبادة الروتين والانتخة ع المكاتب لأن المرتب هيوصل كده كده اخر الشهر..
ايه الاصلاح كمان؟ مراكز القوى وزورا الفجر والسجون والمعتقلات اللي اتفتحت على ابوابه لكل الاتجاهات اللي ممكن تختلف في توجهها عن توجه مجلس الثورة المقدس؟
ايه الاصلاح كمان؟ التعليم المجاني؟ اللي بيطلع لنا كل سنة خريجي كليات ماتعلموش بجد والدولة مش محتاجة تخصصاتهم بجد برغم انها محتاجة لتخصصات فنية ويدوية تانية الناس بتهرب منها عشان الوجاهة الاجتماعية ولأن التعليم المجاني زين لهم النوع ده من الهروب للشهادة الجامعية عديمة القيمة في كثير من الاحيان؟
ايه الاصلاح كمان؟ الجمعيات والبونات والكسوة الصيفي والشتوي؟؟
ايه الاصلاح كمان؟؟ الاحزاب اللي مكانتش موجوده؟ والاعلام الموجه اللي بيتكلم بإسم الحكومة وبس؟ بإسم ناصر وبس؟ الشعب اللي بيحفز بالحنجرة والكلام الحلو، مش بالمنطق والعقل
ايه الاصلاح كمان؟؟ الانتخابات اللي كانت بتبقى نتيجتها 99.9% وش... ما احلي ديمقراطية ناصر.. نصير الحق والحرية
اي الاصلاح كمان؟ التساهل في ارواح المصريين وارسالهم لحرب اليمن؟ وللا نكسة 67 اللي بنرميها على اسرائيل، مع انه شيء متوقع ان اسرائيل تنتهز فرصة ضعفنا وانهيارنا اللي استشرى في الجيش بعد حرب اليمن.. وكان لازم تستغل الفرصة.... بدل ما نعترف بتقصير ناصر وعامر وتهورهم.. نقول ان العالم بيتآمر ضدهم؟
يمكن اكون مش قادرة اشوف حاجة حلوة لعبدالناصر دلوقتي.. بس دا لأن كل حاجة بقيت اكتشف انها قصر نظر وتهور.. محاولة لبناء دولة من قبل ناس كل اللي بالهم انهم بيحبوا مصر وبس.. حتى لو ماكانوش عندهم مهارة وعلم "الادارة" وذكاء الحاكم اللي يقدر بطور وينمي ويبني ويحمي وياخد قرارت ذكية مبنية على دراسة وتروي وبعيدة عن التهور والاندفاع
ودلوقتي لو حصلت ثورة الجياع، مين اللي هيمسك البلد؟؟
مساء الخير انا
مساء الخير
انا من زمان متابع اللي بتقوليه....لكن عمر ما حاجة كتبتيها استفزتني انني اعلق عليها... ويمكن دي اول مرة اعلق على حاجة مكتوبة بمدونة
اللي عايز اقوله .. انه اللي استفزني علشان ارد هو المنطق اللي بتحكي فيه.. انا مش حدافع عن الثورات رغم انه الثورة الفرنسية غيرت شكل العالم وده مش كلامي ده كلام مؤرخين وفلاسفة عاصروا الثورة الفرنسية او بعدها.. المهم... انه المشكله الاساسية في الموضوع هي فكرة الانسان عن الصح والخطأ.. يعني ايه هو الصح ؟؟ ومين بيحدد انه ده صح ؟؟؟ وايه هو الغلط ؟؟ ومين بيحدد ايه هو الغلط؟؟ مين بيحدد انه ده خير والا شر ؟؟؟ انا متأكد انه مفتاح الحل بالاجابات على الاسئلة دى
جميل جدا البوست
جميل جدا البوست ده
ومستفز كلامه مينفعش حد يقراه ومش يرد
بس لو الثوره مش حل
طب ايه الحل
بتقولي الثوره لو حصلت هتقلب التربيزه معاكي امور كتيره هتتعقد
طيب لو متقلبتش الترابيزه ماهي الامور كده كده معقده
طيب التغيير يكون ازاي
هننتظر لما الشعب يكون واعي مثلا !!
مظنش خالص
احنا في حالة غليان ومستحيل الوضع هيفضل علي ماهو عليه
ايه الحل !!!!
الأخت العزيزة
الأخت العزيزة زينب اسمحيلى اقلك بالصراحة شديدة انتى مش فاهمة أى حاجة وكلامى والله مش على سبيل التجريح ابدا انتى فعلا مش فهما أى حاجة
حولى تقرى كتب ولكتاب سواء كده أو كده المهم القراءة وسيبك من الى انتى بتقعدى معاهم كلام المصاطب ده مش صحيح
انا مش قادرة
انا مش قادرة اخد كلامك الا انه على سبيل التجريح، لأنك لو كنت تقصد فعلا تنصحني وتوجهني وتفهمني اللي انا مش فاهماه كنت تعبت نفسك شوية وكتبت اللي انت فاهمه وعارفه.. او حتى الكتب اللي ممكن اقراها واعرف.. وللا ايه؟
good post thx u banota
good post
thx u banota masry
oops..
no comment
تعلـيق