ياريس.. هيلا هيلا هيلا

انا جييييييييييييييييت سمعت كلمه الهندسه المعماريه قلبي متحملش قالي لازم نفهم ايه الموضوع دي عشره برده بنا وبين الهندسه المعماريه

بصي ياستي انا مش هقلك اني موافقاكي في الكلام دا ومش هقلك كمان ان البيوت دي بتبقي ولا محتاجه تكيف ولا دفايه لانها بتظبيطات معينه بتقدر تحتفظ بنسبه الحراره جواها الصبح وتطلعها بالليل لو رحتي اسوان والنوبه هتلاقي بيوت هناك كده كتيره بس قديمه لانه بطلو يستخدمو النظام دا من زمان قووووووي هوا اه غير مكلف ومبحتاجش حديد وخرسانات والدوشه دي كلها فتقدري تقولي عليه بيت صحي وصديق للبيئه وياحبذا كمان لو اتعمل من الحجر الله بجد ياخد البيت المثالي بس للاسف كل المقاولين والمهندسين الانشائين والتراخيص اللي بتتعمل بيتبقي للبيوت ذات الاساسات الخراسانيه علشان معامل الامان بقي وحسابات التعليه والاحمال و و و وبحسبه بسيطه اللي هيدفعه في الحديد باليمين هياخده بالشمال من الناس لانه هيبني البيت 15 و 20 دور انما 5 ادوار دا مياكلهوش حاجه وعلفكره 5 اداور كتيره قوي لو بالحوائط الحماله لانها لو حسبنا تخانه الحيطه في الدور الاول لن تقل علي متر او متر ونص تخيلي بقي المنظر والناس هتعيش ازاي من تخانه حيطه 15 سم لتخانه متر ونص مش هيبقي فيه شقه ساعتها هتبقي حيطان وبس
واخيرا البيوت بالحوائط الحماله عموما اقصاها دورين او تلاته اكتر من كده بيبقي صعب قوي
ايه الرغي دا كله

اه صحيح.. انا ناسية الحكاية دي يابشمهندسة P:

بصي يا ستي، حلو اوي الكلام عن البيت الصحي ده، اهو دا مكنتش اعرفه اصلا، وكويس انك اضفتيه وبكده الفكرة كبرت في دماغي اكتر :)، اذا كانت المشكلة في انهم بيبنوا خمستاشر وعشرين دور، فأنا لما اتكلمت ما جبتش سيرة الشريحة دي يمكن هما يتطمنوا اكتر للخرسانة انما انا بتكلم عن الاهالي والاسر اللي الواحد منهم بيرجع من الخليج وللا لو ربنا فتحها عليه هنا وقرر يبني بيت ليه ولأولاده فمش بيبني اكتر من كام دور يلم بيها عياله، ودا انا بشوفه وعارفه اصحابه بما اني من سكان الاقاليم.. والحكاية عندنا ان الناس بتميل اكتر انها تبني من انها تأجر..

انما الحيطان العريضة ايه مشكلتها؟ انا مش فاهمة.. ما الناس زمان كانت بتبني بالطريقة دي.. وبعدين تخانة متر ونص بتاع ايه؟ في حيطة في الدنيا متر ونص؟ انا اعرف بيوت عندنا معمولة حوائط حمالة والحيطان مش متر ونص تخانة.. مش ممكن D:

انا كمان بنسي الموضوع دا كتير عاتي يعني
اولا سيبك من البيت ابو حجر او الصحي لانه موضوع كبير قوي ابقي احكيهولك علي رواقه
ثانيا اكيد يعني مفيش حيطه سمكها متر ونص تخيلي كده لو سمك الحيطه متر ونص وهيا كل مساحتها 3ف3 هيبقي منظرها عامل ازاي
بصي هيا ايه فكره الحوائط الحامله اصلاا؟ او يعني ايه حوائط حامله؟؟ "أي أن تعريف الحوائط الحاملة هي تحويل الحوائط الفاصلة في مباني الخرسانة الهيكلية إلى حوائط حاملة وحذف الهيكل الخرساني للمبنى ، وهذا التحويل يؤدي إلى توظيف الحوائط لحمل الأوزان كوظيفة رئيسية إضافة إلى وظيفة الفصل بين المساحات" يعني بدل ما تحملي الاوزان علي الهيكل الخراساني لا بتحمليه علي الحوائط فا سمك الحيطه بيتحدد علي حسب عدد الادوار زي ماهو مكتوب كده

- تحديد سمك الحائط الحامل تبعا لارتفاع المبنى: -

ارتفاع المبنى عدد الطوابق سمك الحائط الخارجي
يعني لو ارتفاع المبني 7 متر دورين يعني يبقي سمك الحيطه 52 سم
ولو ارتفاعها 10 متر يبقي الدور الارضي 38 سم والتاني 25 سم
ولو 13متر يبقي ك سمك الحائط الخارجي للأرضي 51 سم والأول والثاني 38 سم والتالت والرابع25 سم واخدالي بالك 51 سم يعني نص متر و1 سم ودا كله الحوائط الخارجيه

*ملاحظة :- مباني الحوائط الداخلية للمبنى تنفذ جميعها بسمك 25 سم ، أما الحوائط التي يركب عليها درجات السلم فتنفذ بسمك 38 سم .
يعني كل دور بيحمل علي اللي تحتيه لانك لازم تبقي عامله حساب حاجتين
dead load ودا اللي هوا وازن الحيطان والاسقف والكمرات والدروه والحاجات دي
live loadودا وزن الاثاث والبني ادمين ودا دايما بيبقي متغير ملوش حاجه ثابته
وبصي هنا كده http://m3mare.com/art/modules.php?name=News&file=article&sid=25

http://www.maimani.com/lbearingconsys/LD_REP.FIN.htm
والي متفهميهوش قليلي عليه وانا اشرحهولك

سلاماتي

و الله يا زوزو تصدقى انا و ماما مش مهندسين و لا خريجى هندسة لكن مرة اتكلمنا على الموضوع ده حول البناء زمان و دلوقتى و بره و جوه
والله ياريت نرجع زى زمان على الاقل مش هيبقى فى احتكار و لا قرف
بيت ابو جدى مبنى على الزمان ده فى الجيزة و البيت مش الله موجود و زى الفل
شكرا يا زوزو
انا كمان لو وقعت على فلوس من السماء و حتة ارض هاستخدم نظام الحوائط الحاملة

الحوائط الحاملة فكرة هايلة
وانا علي علم بمحاولة من صحفيين في اكتر من جريدة بعمل حملة حول هذه القضية , لانها الامل الوحيد في قضية احتكار عز للحديد

مافيش تراخيص بتطلع"على حد علمي ومن تجربة شخصيه" على الاقل من وجه بحري لإسكندرية لبيوت بالمواصفات دي,في مقياسات معينه بتتعمل,وعليها بيتبنى البيت الخ.
طبعاانا موافقك جدا في كلامك,بس حبيت ابقي رخم وافوقك:)

ولا وجه بحري ولا قبلي ولا في اي حته حاليا للاسف

بيت جدى فى المحله الكبرى يعنى على ارض رخوه ومياه جوفيه وحطان حامله وبقاله اكتر من 100 سنه وحاله احسن من بيتى الجديد فى سته اكتوبر والى العاوميد فيه مهدره ربعه

بس عادى يعنى ممكن الحكومه تطلع قانون بمنع البناء على حوائط حامله

السلام عليكم,
انا حبيك اشارك معاكم بخصوص موضوع "الحوائط الحاملة" عن طريق مثال عملي تقدروا تشفوه بعنيكم. انا قمت بتصميم المبني ده والاشراف عليه من الالف للياء(انا مش مهندس ومدرشتس هندسة,بس هو عشق وتعلم ذاتي ).تقدروا تشوفوا المبني علي الرابط www.al-diwan.fr
هناك كتاب للمهندس حسن فتحي اسمه عمارة الفقراء ما فيش بعد كدة. انا استعنت بالكتاب ده بس الطبعة الانجليزية وبعد كده لقيتو بالعربية طبعة" القراءة للجميع"
الحقيقة ان الحكومة مش حتشجع اي فكرة تقلل من مكاسب الحيتان والدينصورات...
لو فكرنا في موضوع "القمح" وازي احنا بنستورد من سوريا والسعودية!!!! حنفهم "الفولة" اللي احنا برضو بنستوردها...
لك الله يا مصر من قبل ومن بعد...وحسبنا الله ونعم الوكيل

السلام عليكم
انا كمان مقدرتش امسك نفسي لما شوفت كلمة هندسه معمارية عشقي الأول و الأخير انا مهندس معماري"مع ان اللقب ده محتاج شغل و ثقافة كبيرة جدا" بس يلا الواحد يتمحك فيه و خلاص بدعوة اني درستها في الجامعة، ما علينا انا مبسوط جدا من علاء عشان ذكر حسن فتحي المثال الحي على ان "زمار الحى لا يطرب" هذا المعماري العبقري حط مبداء بسيط جدا وعبقري في نفس الوقت هو قال كل واحد يبني من البيئة المحيطه يعني لو انتي في الريف أبني بالطين و لو انت في الصحراء أبني بالرمل و هكذا طبعا المبداء ده في ناس كتير حربته و فهمتوا علي انه دعوه للتخلف و الرجعية و عودة للوراء وازي نعمل أبراج و ناطحات سحاب زي دول العالم المتقدم و طبعا الناس مفهمتش ان المبداء لو اتعمل بيه في المدينه يبقي تبني بالخراسنة لأن هي دي الماده المناسبة. و حسن فتحي الناس حربته في مصر له مشاريع كتيره في دول العلام المليانه ناطحات سحاب و كرموه وقالوا انه صاحب مدرسه معمارية وبعد سنين طلع حاجة اسمها العمارة الخضراء بتقول نفس الكلام الهو قالوا.وطبعا لو احنا عملانا بالمبداء ده هنوفر كتير جدا ونحارب الفيا و الخرتيت و بقيت الحدبقة البتستغلنا.
طبعا انا رغيت اكتر واحد بس الموضوع فعلا أستفزني و حرك المهندس الاعتقد انه بيلفظ انفسه الأخيرة جوايا.